დანიის სამეფო
საკონტაქტო ინფორმაცია
- კალვებოდბრიუგე 45, კოპენჰაგენი 1560, დანია
- 09:00 – 18:00
- [email protected]
- https://geoconsul.gov.ge/ka/register/visit
- +45 28 78 26 33+45 28 89 98 12
დიპლომატიური ურთიერთობების ქრონოლოგია
დიპლომატიური ურთიერთობები საქართველოსა და დანიის სამეფოს შორის დამყარდა 1992 წლის 9 ივლისს.
დანიის სამეფოში საქართველოს დიპლომატიური წარმომადგენლობა გაიხსნა 2006 წელს.
დანიის საელჩო საქართველოში გაიხსნა - 2022 წელს.
2022 წელს ორ ქვეყანას შორის დიპლომატიური ურთიერთობების დამყარების 30 წლისთავი აღინიშნა.
თანამშრომლობის ძირითადი სფეროები
დანიასა და საქართველოს შორის ურთიერთობები მზარდი დინამიკით გამოირჩევა, რის დასტურსაც წარმოადგენს 2022 წელს საქართველოში დანიის დიპლომატიური წარმომადგენლობის გახსნა და პირველი რეზიდენტი ელჩის აკრედიტაცია.
ქვეყნებს შორის აქტიურად ხორციელდება მაღალი დონის ვიზიტები. 2022-2023 წლებში, დანიის საგარეო საქმეთა მინისტრი ორჯერ ეწვია საქართველოს, მათ შორის, 2023 წლის მაისში, თბილისში დანიის საელჩოს ოფიციალური გახსნის კონტექსტში. იმავე წელს, საქართველოს საგარეო უწყების ხელმძღვანელი საპასუხო ვიზიტით ეწვია დანიას. ვიზიტის ფარგლებში, ორი ქვეყნის საგარეო საქმეთა სამინისტროებს შორის, ხელი მოეწერა ურთიერთგაგების მემორანდუმს, რაც ქმნის ინსტიტუციურ ჩარჩოს პოლიტიკური და განვითარების სფეროში გაძლიერებული თანამშრომლობისთვის. ორმხრივი თანამშრომლობის ქმედით ინსტრუმენტს ასევე წარმოადგენს საქართველოსა და დანიის საგარეო საქმეთა სამინისტროებს შორის პოლიტიკური კონსულტაციები, რომელსაც რეგულარული ხასიათი აქვს.
საქართველოს და დანიას შორის ურთიერთობების განსაკუთრებულ დინამიკაზე, ისევე როგორც დანიის მზარდ ინტერესსა და ჩართულობაზე მიუთითებს ქვეყნის საგარეო და უსაფრთხოების პოლიტიკის ახალი სტრატეგია, რომელიც 2023 წლის 16 მაისს გამოქვეყნდა. დოკუმენტში გამოხატულია მხარდაჭერა საქართველოს ევროპული ინტეგრაციის მიმართ, ასევე ხაზგასმულია ქვეყნის მოწყვლადობა რუსეთიდან მომავალი საფრთხეების კონტექსტში.
ორ ქვეყანას შორის ძალაშია რამდენიმე შეთანხმება, რაც ძირითადად არეგულირებს საგადასახადო, ასევე თავდაცვისა და განვითარების სფეროებში თანამშრომლობას.
საქართველოში უმცირესობების დაცვის, იძულებით გადაადგილებულ პირთა ინტეგრაციის და ზოგადად, კონფლიქტით დაზარალებული მოსახლეობის დასახმარებლად განხორციელებულ საქმიანობაში აქტიურ როლს თამაშობს დანიის ლტოლვილთა საბჭო (Danish Refugee Council).
მხარეები მუშაობენ სავაჭრო-ეკონომიკური ურთიერთობების შემდგომი გააქტიურების კუთხით. აღსანიშნავია, დანიური კომპანიების მრავალწლიანი მოღვაწეობა საქართველოში. 2023 წლის მაისში, საგარეო საქმეთა მინისტრის ვიზიტის ფარგლებში, საქართველოს ეწვია ბიზნეს დელეგაცია, რომელშიც 10-ზე მეტი კომპანია იყო წარმოდგენილი. აღნიშნული კომპანიები მეტწილად, განახლებადი ენერგიის მიმართულებით მუშაობენ.
განსაკუთრებული აღნიშვნის ღირსია წარმატებული თანამშრომლობა ენერგეტიკის სფეროში. დანიური მხარე ჩართულია საქართველოს შესაძლებლობების გაძლიერების და ენერგეტიკული ტრანსფორმაციის პროცესში.
ორმხრივ ურთიერთობებში, მნიშვნელოვანი ადგილი უჭირავს პროდუქტიულ თანამშრომლობას თავდაცვის სფეროში, რამაც განსაკუთრებული დინამიკა 2010 წლიდან შეიძინა. ძირითად მიმართულებას ეროვნული გვარდიის განვითარების საკითხი წარმოადგენს. დანიური მხარე ასევე ჩართულია „ნატო-საქართველოს არსებითი პაკეტის“ (SNGP) განხორციელების პროცესში.
თანამშრომლობა განვითარების სფეროში
ორმხრივი დღის წესრიგის მნიშვნელოვანი ნაწილია განვითარების სფეროში არსებული მრავალწლიანი თანამშრომლობა, რამაც საქართველოს ინსტიტუციურ და სოციალ-დემოკრატიულ ტრანსფორმაციას შეუწყო ხელი. თანამშრომლობა „დანიის სამეზობლო პროგრამის” (DANEP) სტრატეგიის ფარგლებში ხორციელდება, რომელიც 2013 წელს მოქმედებს. DANEP-ის ორი მთავარი მიმართულებაა: დემოკრატიისა და ადამიანის უფლებების ხელშეწყობა; მდგრადი და ინკლუზიური ეკონომიკური განვითარების მხარდაჭერა. 2017-2021 წლების პერიოდში პროგრამის ბიუჯეტად 860 მილიონი დანიური კრონი (116 მლნ ევრო) განისაზღვრა, საიდანაც 27 მლნ. ევრო საქართველოზე გადანაწილდა.
2022 წლის 27 იანვარს, დანიის საგარეო საქმეთა სამინისტრომ გაახმოვანა აღმოსავლეთ სამეზობლო პროგრამის მეორე ფაზის ამოქმედება. აღნიშნული პაკეტი ითვალისწინებს, 2022-26 წლების ვადაში 875 მილიონი დანიური კრონის (დაახლოებით 117 მილიონი ევრო) გამოყოფას უკრაინასა და საქართველოსთვის. გამოყოფილი თანხა ზემოხსენებულ ქვეყნებში სტაბილურობის, პროგრესისა და მედეგობის ხელშეწყობას მოხმარდება. საქართველოს დახმარების ბიუჯეტი 150 მილიონ დანიურ კრონს შეადგენს (დაახლოებით, 20 მლნ. ევრო).
სამეზობლო პოლიტიკის ფარგლებში განხორციელებულ პროექტებს შორის აღსანიშნავია წარმატებული თანამშრომლობა ენერგეტიკის მიმართულებით, რომელიც საქართველოში ენერგოეფექტურობისა და მდგრადი ენერგიის განვითარებას ისახავდა მიზნად, მათ შორის, ენერგეტიკის სფეროში რეფორმების განხორციელებას ევროკავშირი-საქართველოს ასოცირების შეთანხმების შესაბამისად.
„ახალი დემოკრატიის ფონდი“
2021 წლის 18 მარტს, დანიის საგარეო საქმეთა სამინისტროს ინიციატივით, დაფუძნდა „ახალი დემოკრატიის ფონდი“ (NDF), რომელიც მიზნად ისახავს აღმოსავლეთ სამეზობლოში სამოქალაქო საზოგადოებისა და დემოკრატიზაციის ხელშეწყობას. NDF ხუთი დანიური ორგანიზაციისაგან შემდგარ კონსორციუმს წარმოადგენს და მასში მთავარი მაკოორდინირებლის ფუნქცია აკისრია დანიის კულტურის ინსტიტუტს (Danish Cultural Institute). ფონდი ფინანსდება საგარეო საქმეთა სამინისტროს მიერ.
განსაზღვრულია NDF-ის საქმიანობის ექვსი პრიორიტეტული მიმართულება: კლიმატის ცვლილებებთან ბრძოლა, კულტურა, გენდერი, შრომის ბაზარი, მედია და ახალგაზრდობა. პრიორიტეტული სფეროების მიხედვით კონსორციუმი გასცემს მცირე გრანტებს კულტურული და ახალგაზრდული ცენტრებისთვის, მედია საშუალებებისთვის, ასევე კლიმატის, გენდერისა და შრომითი უფლებების თემაზე მომუშავე არასამთავრობო ორგანიზაციებისთვის.
საპატიო კონსულები
2015 წელს გაიხსნა საქართველოს საპატიო საკონსულო დანიის სამეფოს იუტლანდიის რეგიონში. წარმომადგენლობას დანიაში საქართველოს საპატიო კონსული მარიანე ბოლსი ხელმძღვანელობს.
